16-07-2017
|
|
|
عيونك في عيوني
ترى الفرقا رياح الموت وعروق الفؤاد عذوق
تتطيح إن مالقت وصلٍ ن مع الأيام تروى به
تعال لشوفتك قلبي ترى من غيبتك محروق
فراقك موت لوتدري وشوفك طوق ننجا به
معاليقي بكت وأبكت مناديلي دموع الموق
وتسألني بعد ماغبت عني الدمع وش جابه
فقدت بغيبتك طعم الحياه ولونها والذوق
حزن يعقوب في قلبي بعد ماغبت ينتابه
تجمّل لاتوادعني أخاف الجرح منك يفوق
ويصحى من وداعك كل حزنٍ مسدل أهدابه
عسى الله لايبارك فالغياب ولايجيب العوق
لعينٍ ن من غيابك ياعديل الروح منصابه
قسم بالله صدري في غيابك مبتليه الشوق
ونفسٍ ن ماتحن لشوفتك لاغبت كذابه
أحبك كلمةٍ ن تحرم من لساني على معشوق
أحبك لك لحالك لو كلام الحب متشابه
عيونك في عيوني لاعجز يشرح لك المنطوق
ترى عين المحب لسان ماتكذب على احبابه
ترى مانافسك في خافقي غيرك ولا مخلوق
تتطمن واسكن لحالك بقلبي واوصد ابوابه
|