يمه جروحي بالحنايا اليمه
نارن لها عامين في داخل الجوف
صابر على مر الليالي وضيمه
مادام اشوفك للمعاناه ماشوف
انتي مطر وانتي سحابه وديمه
عسى تعبك اللي بنا كان مخلوف
حنا برجى ربن كفوفه كريمه
سبحانه اللي في مخاليقه يروف
من يجحد أصحابه يشوف الهزيمه
لابد ماوقته يخليه مكتوف
مافي ورا خوة مصالح غنيمه
راع المصالح عند الاجواد مكشوف
ماعاد له عندي معزه وقيمه
من جملة الغالين شرواه محذوف
وماعاد له عند المطاليق شيمه
يوم أنه أصبح في سواياه معروف
ماهو بكفون للقدر والحشيمه
ارفع مقامي عن مساكين وضعوف
دامه سلك درب الردى والنميمه
ماعاد ينفع فيه طيبن ومعروف
حافظ على خوة نشاما قديمه
بعض الجديد اليوم ماهو بمألوف
والصاحب الوافي عسا الله يديمه
ماقد تعذر عنك باشغال وضروف
عنده على الشدات قوة عزيمه
يفداك في روحه ولاحسب الخوف
وصلاة ربي عد وبله وغيمه
على النبي اعداد ماتكتب حروف