منتديات هبوب الجنوب - عرض مشاركة واحدة - (أحلام ) قصة رائعة * كاملة/ بقلم/ رشا الصغير

22-03-2014

(14)
مفاجأة

تغيرت كثيرا تلك الفترة .. لست على ما يرام .. أصبح كل من فى البيت جميعا يتجنبونى ويتحاشون الاحتكاك بى .. لقد أصبحت عصبية جدا
(عصبية) .. من لا يؤمن بنظرية المؤامرة هل يجد لى تفسير لهذا الحرف العشرى الذى لا يفارقنى
عشرى !! رحماك يا رب
- أ أ أبلة .. أ أحلام

قالتها مى وهى تأخذ ساتر خلف المقعد
وبنبرة نافذة الصبر
- اممممممممممم
سمعت دقات قلبها تدوى وهى تقول
- فيه تليفون عشانك يا أبلة
واختفت فورا من أمامى قبل أن أقذفها بالمزهرية رغم أننى لم أكن أنوى ذلك مطلقا
اتجهت نحو الهاتف وبنبرة تجمد الدماء فى العروق
- نعم
- مساء الخير
أجابنى الصوت الرجالى الغريب
- مين حضرتك؟
- أنا خالد
(خالد .. هل سمعت هذا الاسم من قبل؟)
- خالد مين؟
- خالد صاحب المكتبة

عادت لى الذاكرة دفعة واحدة وأيقظت الذكرى النمرة الحبيسة داخلى لتنشب مخالبها فى وجه هذا الجاحد صرخت فيه بحنق
- صاحب المكتبة راح خلاص .. ما تنسبهاش لنفسك
- يا آنسة ....
- انت بتتصل ليه دلوقتى ؟
- أنا .....
- وجبت رقم تليفونى منين؟
- الرقم .........
- ومين سمحلك تتكلم معايا أصلا؟
- يا آنسة اهدى شوية عشان أفهمك
- تفهمنى ايه
- أنا عايزك فى شغل
شغل؟
- أيوة
- آه .. ده فى نت الكافيه
- نت كافيه ايه؟
- آه يبقى صالون الحلاقة
- حلاقة!!
- خلاص يبقى فى السوبر ماركت آهو برضه الجبنة والزيت أحسن من شوية الكتب
- انتِ بتقولى ايه؟
- باقول آسفة .. أنا بعد المكتبة مش هاشتغل فى حاجة تانية
- ومين قال هتشتغلى فى حاجة تانية
- قصدك ايه؟
- ما هو بس لو اديتينى فرصة هافهمك
- ......................
- آلو
- ايه باديلك فرصتك وبرضه ما قولتش يبقى مع السلامة
- استنى بس انتِ دايما عصبية كده
- مع اللى يجيبوا العصبى بس
- الله يسامحك
- اتفضل اتكلم
- أنا عايزك ترجعى تشتغلى فى المكتبة تانى
- أى مكتبة ما راحت وراحت الكتب بتاعتها
- معندكيش خبر
- خبر ايه؟
- انها رجعت
- هى مين دى
- الكتب
- يا سلام على أساس إنها راحت تصيف ورجعت بالسلامة
- لأ على أساس راحت تتخزن لغاية ما المكتبة تتجدد وبعدين ترجعلها تانى

لحظة صمت مصحوبة بذهول يشوبها التوتر ويغمرها عرق الخجل البارد
- الكلام ده صحيح يا أستاذ خالد

لحظة توجس أصابته من تغير نبرة صوتى مصحوبا بمنحة احترام غير متوقعة ثم جاء صوته وهو يقول
- طبعا .. أنا عمرى ما فكرت انى أغير نشاط المكتبة وأنا عارف هى كانت إيه بالنسبة لعمى

ابتلعت توترى وخجلى وأنا أقول
- يعنى مفيش حاجة اتغيرت
- اتفضلى شرفينا بكرة وانتِ تشوفى بنفسك
- إن شاء الله .. أنا ...

حاولت أن اعتذر عن كل ما فعلت وقلت لكن خانتنى شجاعتى
- أنا هاجى بكرة إن شاء الله
- مع السلامة
- مع السلامة