منتديات هبوب الجنوب - عرض مشاركة واحدة

اوسمتي · #1 19-02-2023

سلام الله على العذب اللطيف الناعم الفتّان
سلام الله على سحر العيون ومابدآ فيها

سلام الله على القلب الحنون ونبضه الولهان
أحس بنبضته داخله وأعرف معانيها

كأنه يوم ينبض يرسل الأشواق للشريان
وشريانه يوزعها على جسمه ويبديها

أحس بنبضته كلمة أحبك من أرق إنسان
وأحس بضحكته شمعة غلا دنياي تضويها

حنانه يقلب الضيقة سرور ويطرد الأحزان
ويازين المشاعر يوم يآخذها ويعطيها

أحبه كثر مايطري عليّ ويشعل الوجدان
كثر مايهدي أعماقي سعاده يوم يلفيها

أحبه كثر زين يحتويه وفي عيونه بان
كثر ماهمسته تسحر سموعي يوم توحيها

وأحبه كثر ماقلبه نظيف وبالوفا مليان
كثر ماتشتعل نيران شوقي ثم يطفيها

أحبه كثر ماجاد السحاب وصادق الأمزان
بغيث يسقي وساع الفيافي لين يرويها

أحبه كثر ماله في الخفوق وفي عيوني شان
كثر مايصنع البسمة على شاني ويهديها

نثرت أعذب أحاسيسي قصيده بأعذب الأوزان
بدايتـــها على آن ونهايتـــها على إيــــها

على شانه إليا منه قرآها ينتفض فرحان
يرددها من الفرحة ويرجع لي يغنيها

وأردد له هلا والله وحشني صوتك الرنان
هلا والله فديت الهمسه الحلوه وراعيها

ويسألني وش أخبارك ؟ وش إحساسك معاي الآن ؟
وهل باقي مشاعر داخلك مازلت تخفيها ؟

وأقول أخباري إني في وجودك يا أجمل الخلان
كأني مالك الدنيا من أولها لتاليها

وإذا باقي بصدري شي مايستحمل الكتمان
ولهت لشوفة عيونك عسى عيني ماتبكيها

وإذا ودك تشرفني بداري سجّل العنوان
مابين ضلوع صدرك يالغلا بأيسر محانيها

يجاوبني خجل وأضحك طرب من ضحكة الخجلان
وأقول تدوم هالضحكة عسى ربي يخليها

الموضوع الأصلي: ترى هذا على شااااانهـ ....؟؟ || الكاتب: عاشق الطيب || المصدر: منتديات هبوب الجنوب

www.h-aljnoop.com

كلمات البحث

العذوب ,نجوى الروح معجبون بهذا