منتديات هبوب الجنوب - عرض مشاركة واحدة

11-05-2017

أمس الضحى عديت في نايف الحيد
مابين شعر وبين خشم الفريدة
مثلي على المبداء يحده حواديد
يصمد وراع الـهم مـاله صمـيده
يسوقه الهاجوس سوق المعاويد
للضيق كنه فوق حام الوقيده
همٍ يقدد ثومـة القـلب تقديد
يا هنيكم ياأهل القلوب البليده
لو إني أرقد نوم بعـض السلابيد
ماشفـت حالي ناحلٍ كالجريده
النوم للي مايحـسـب المناقيد
ماهمه إلا كيف يملا مسيده
لا ناطحٍ قاله ولا جايبن فـيد
وليا فـتح عينه لقـاها رغـيـده
راحوا وخلوهـا الرجال الصناديد
قرنٍ لحقـته مابقــا له شريده
يوم الطمع دونه رمـاح و بواريد
والنذل تنشـب كلمته فـي وريده
الحر يفرس والحـباري مجالـيد
يعرف بهـا الطيـب من أيا بديده
مايعرفون ابها هل الحسد والكيد
ولا يفتخر راع الرصـيد برصـيده
واليا اختلف سلم العرب والتقاليد
من مات منهـم لا تعده فقـيده
لو هو قريبٍ منك فرقى الردي عيد
جعله مـن الدنيا يعجل شـديده
يعيش معـزولٍ عن الناس ووحيد
أخير من قرب الوجـيه القريده
يوم إني اذكر بعض الأحوال يافهيد
الوقت جـافي والـموارد زهـيده
وإن حدة الحاجه لبعض الرعاديد
اليوم ماينفع عضـيدن عضـيده
نفسي معودها على الصبر تعويد
والصبر نكسب به صفاتٍ حميده
وخير الكلام الذكر من غير تحديد
مع خالص النية وطيـب العقـيده
يقولـه اللي مانشد زيد وعبـيـد
بالمصحـف الطاهر لقى مايفيده
من طبق اللي فيه نـال المقاصيد
وسلك طريق أهل الحياة السعيده
مايستوون أهل القشر والأجاويـد
الله فرقـهـم فــي أمورٍ عـديــده
قال : اعملوا تلقون وإلكم مواعيد
أجل قصير ومن قضى أجله نعيده
مرجاعهم لله جمـوع وتفـاريد
والله بخلقه يفعل اللي يريده
دنياك مافيها حيـاةٍ سرامـيد
زرع الفنا لابد له من حصيـده
من ساربالسكه وصل لآخرالسيد
العبـــد لابد المنـــايا تـصـيـده
ترا المـنايا للبـرايا حواصـيـد
والموت له مع كل نفـس وعيـده
والرابح اللي من هل الخير وشهيد
وادرك بحسن الخلق مرضاة سيده
حبـله يـورد طـيـبـات الـمواريـد
لاصـار مع ربه حبـاله جـويـده
والحكم للي يبدي الخلق ويعيـد
هو ربنا الواحد وحـنـا عبـيـده

من نوادر : بندر بن سرور العتيبي رحمه الله

همس الجواهر ,جنان الكلمة معجبون بهذا