يقول من في نظم الاشعار حساس
يتعب عليها لجل فيها حساسه
يبني على مبدا ومعنى ومقياس
نظم الجواهر مادخلها نحاسه
حتى ليامن سجلت ترفع الراس
وتصير فيها الفايدة والوناسه
لهل العقول تصير ذكرى ونبراس
وتفضح مخطط كل راعي خساسه
هيضني اللي يجعل الفكر يحتاس
جيل تشيب روس الاطفال ناسه
بعض الشباب مقلدة طبع الانجاس
أهل التنعم والترف والملاسه
والمرجله تبغي مع قوة الباس
توفيق من رب العباد وحماسه
فن المراجل من عطا والي الناس
وهبه من الرحمن ماهي دراسه
أحدن عطاه الله وخذها على ساس
واحدن عطاه الله وخذها فـ راسه
وترى الرجال أشكال وألوان وأجناس
والرجل يعرف مستواه ومقاسه
فيهم أسد وحماه ماهو بينداس
تخشى السباع الضارية قو باسه
وفيهم جمل ينقل ولو حسه الحاس
ومن جا تحت خفه على الأرض داسه
وفيهم سواة الذيب للبعد نواس
وراد شرادن بعيد العساسه
وفيهم سواة الثور ياكل ويحتاس
مايعرف البر الحمر من كناسه
وفيهم سواة اللي ورا البيت حراس
لاكمل الماعون خان الحراسة
وفيهم حصيني عيشته مكر ولحاس
جبان لكن فيه بعض السياسة
أبنذر اللي عاد في راسه عطاس
يرفع عياله عن بيوت النجاسة
جود مناسبهم ترى العرق دساس
بعض الاسود مخلفين بساسة