ومرات اثقل ثقل نقعد شايلة **
** ومرات حمل الريش نغلب فيه
ومرات نحمل فى حمول الزايلة**
** ومرات حتى الجرد نغلب فيه
ومرات نقرب والموانع حايلة **
** ومرات نبعد رغم شوقى ليه
ومرات نسقى والجوابى فاضية**
** ومرات نعطش والميه فيه
ومرات نذهب فى خيار القايلة **
** ومرات حتى الليل نخبر فيه
مرات عقلي ما هناك مثايله**
**ومرات حتى شبر نغرق فيه
ومرات نردع في الجمال الصايلة**
** ومرات جدي الريم نوحل فيه
ومرات نذهب فى خيار القايلة**
** ومرات حتى الليل نخبر فيه
ومرات شيخ وباهيات فعايله**
**ومرات تشبحني تقول سفيه
ومرات متزبك وزي الزايله**
**ومرات عالطاير وبالتنويه
ومرات نكتم سر ماني قايله**
** ومرات تلقاني نثرثر بيه
ومرات نذكر عهد مده طايله**
**ومرات حتى عشاي ننسى فيه
ومرات نكمد عالزمان هوايله**
**ومرات من شوكة انقول أحيه
ومرات تعجبنى البعيد فعايله **
** ومرات حتى خوى نكره فيه
ومرات نعدل في الميول المايله**
** ومرات زي لمكتفات يديه
ومرات ننسى فى جروحه الغالية **
**ونشقى بجرح رفيق وانداويه
مرات يحرمني الزمان جمايله **
** ومرات يالطيف نطغى بيه
والعمر فاني والدعية زايله **
** ومحال توصل كل شي تبيه
وهاذي أحوال القلب واللي شايله**
** هذا أن كان تسأل عليه
مرات نبقي في الحياه طربان**
** ومرات نبقى مالزعل موجوع
ومرات نبعد ع الاحباب زمان **
** ومرات نرجع بالحنين ارجوع
ومرات ليلي نرقده مطمان**
** ومرات نرميه الغطا مفجوع
ومرات نعطي للظلام أمان**
** ومرات من المغرب اندير شموع
ومرات نبكي لين دمعي ايبان**
** ومرات من ضحكي تسيل دموع