24-04-2019
|
|
|
|
|
اقري تفاصيل الحزن
اقري تفاصيل الحزن من زمـاني
بعيون من هو للسهر صار مرهون
عشان تدري كيف بعدك كواني
وعشان تعلم كمّ لفراقنا شجون
تعال واكتبني حروف ومعاني
بعد الغياب اللي به القلب مسجون
أنا على خبرك وهذا مكاني
نفس المكان اللي به الحبّ مركون
ياكم سألني ياعسى ما نساني
قلت الله اعلم ليت به ناس يدرون
جدار متهالك وإذا ما دعاني
له جيت مترامي وضايق ومحزون
ياليت حظّي لا زهمته لقاني
ما كان صار الحال من دون في دون
لكن على الله يالزمـان الأنـاني
جيتك وأنــا عاقل وعوّدت مجنون
ودام الصبـر مفتاح كـل من يعاني
برجي عظيـم الجود ومـدبّـر الكون
الـواحـد الدايمـ وكل حيّ فاني
سبحـانـه المعبود وابليس ملعون
|
|