منتديات هبوب الجنوب - عرض مشاركة واحدة

#1 10-02-2024

يا غيم وش ودّك وأنا اقول لبيه
آمر ولكن لا تجي حول فرقا
ودّك وأنا اقول لبيه

يا غيم وش حدّك لكثرالمشاريه
وبلك يبي ينزل ولا أشوف برقا
ودّك وأنا اقول لبيه

يا غيم وين اللي يبيني وأنا ابيه
العين ساكنها وهي منْه غرقا
ودّك وأنا اقول لبيه

هاك الغمام وفيه ذكره وطاريه
بالليل حوّل لي وبالفجر يرقا
ودّك وأنا اقول لبيه

صوته يسليني إذا قال يا هيه
وإلى نطق يا ريم لبيّت شرقا
ودّك وأنا اقول لبيه

كنّه يخيّل لي قريّب واحاكيه
أبكيه لا ناحت على القاف ورقا
ودّك وأنا اقول لبيه

يا غيم ما بعته ولاني بناسيه
لو دام بالغربي أنا يمّ شرقا
ودّك وأنا اقول لبيه

لكن أيامي و وقته وماضيه
خلّت طعون الصد بالحيل زرقا
ودّك وأنا اقول لبيه

يا غيم رح قل له وداعي ويكفيه
والبرد دفّيته من ضلوع حرقا
ودّك وأنا اقول لبيه

خلّك معي يا غيم والصمت أشريه
ما فاد نظم الآه من كل طرقا
ودّك وأنا اقول لبيه

يا غيم خذني عنه ما عاد لي فيه
نويت ذبح القلب والروح شرقا
ودّك وأنا اقول لبيه

كلمات البحث

الوافي ,أبو مشاري معجبون بهذا