منتديات هبوب الجنوب - القحم مع كوم البصل

احبتي في الله
السلام عليكم ورحمة الله وبركاته
اسعد الله مساكم بالخير والستر والعافيه
أحباب وفي القلب لكم مكان ربي يحفظكم
جميعاً اعتقد أنكم في أنتضار مافي جعبة
القحم من سوالف وأبشروا بالطيب والطيبات
وانا معكم وبدونكم انا لاشي هيا توكلنا على
الله الواحد الأحد الفرد الصمد جل شانه

القحم يريد يدخل عالم التجاره بالعرض ودائماً الدخول بالعرض عيوبه وسلبياته كثيره بس مدري كيف الناس الداخله بالعرض كيف نجحت وانا فشلت من أول خطوه يمكن أجد بينكم تجار ولا عقول تفهم في التجاره وفي الدخول معترض لاتبخلون علي يامن يحب القحم ويجيد النصح ؟

في يوم من الأيام جهزت نفسي وفي جعبتي مايقارب الفين ريال 2000 هو مبلغ ليس كبير ولاينفع أن اكون تاجر بهذا المبلغ ولكن حبي للتجاره اعمى بصيرتي واخذت ابو هندوه والبنقال واليماني قدوه كيف عاشوا وكيف نجحوا في التجاره وهم معدمين الا من شوية دراهم طبعاً انا دخلت نافش ريشي وقلت انا ابو زهره كيف هولاء أحسن مني ماهو معقول المهم مربط دراهمي بمطاط لأني لااملك سواها وذهبت للحلقه التي فيها الخضار والفواكه والورقيات واكوام هائله ومهوله اصريت على دخول السوق وحضور الحراج الذي يقام مرتين في الصباح والمساء ولعلي أحظى بصيده تخرج من فم المحرج لجيبي مباشره متباهي بوطنيتي وقبيلتي ياساتر استر ؟

دخلت بثوبي ولابس الشماغ وفي برستيج غير عادي وجدت الحراج على أكثر من سلعه طماطم وخيار وخس وجرجير وبصل وبطاطس وكوسه وجزر وفلفل رومي وحار واذا بالحراج في لمساته الأولى دقائق وينعق بصوته الشجي ذاك الدلال الأنيق طبعاً الفواكه تخرج من البرادات بعد مايقوم عليها المزاد داخل البراده او الثلاجه العملاقه وانا بعيد عن هذا لكون الجيب لايستحمل أن ينافس على براده فيه 1200 صندوق وكرتون انا مسكين لازم ابقى عند الحراج الصغير ؟

وقفت عند الكوسه وبدأ الحراج بفتح الباب الكرتون بريالين ووصل الى ثمانيه ريالات وانباع على تاجر الكوسه المعروف الذي دخل الحراج باسمه وهو غير موجود والشاطر يفهمها حولت على الخيار ونافست حتى وصل المزاد عشره ريالات ونص وبغيت ازود نص ريال وافوز بالخيار ورسى المزاد على تاجر له اسمه الشهير وجسمه فوق الطراحه يتقلب ولايعرف الحراج ولا شم ريح الخيار نقلت عند الجزر وايضاً فاتني الطيب بيع الكيس بتسعه ريالات على تاجر الجزر الذي يمثله مكفوله اليمني وللأسف يبيع الكيس ب 25 ريال وش أعمل ياقوم وانا التجاره في دمي تجري الله اكبر عليك من قحم تعبت وقررت استريح عند شايب في سني جالس ومعه كرتون في اربع حبات حبحب سلمت عليه ودار بيني وبينه الحوار التالي والله يعينكم على هذا القحم المقلع ؟

الواصل : ياعم كيف حالك واخبارك ماشاء الله اشوف الحبحب
معبي الحلقه هل هو موسم ولا مستورد ولا كيف وبكم تبيع الحبه

صاحب الكرتون : ياخوي لاتقول ياعم انت اكبر مني بس ارفق بنفسك انت ليش جاي تشتري حبحب ولا تدور لك شي مفقود في بلد أنت وانا في مولود ياخوي تجاره الخضار لها هوامير اسماءهم رنانه وجيوبهم مليانه ولكنهم خلف ستار اسمه سعوده الحلقه شف هذا المربع الذي فيه كل الخضار والورقيات وخصم شرس في المزاد انه عبدالقيوم البنقالي وهو الذي يوزع على تجار التفرقه وسلطان زمانه وراكب جيب لكزز وانت وانا على ونيتات ولا دباب سزوكي

الواصل : طيب طال عمرك انت من فين اشتريت الحبحب وليش باسط هنا ومالك مكان رسمي تمارس فيه تجارة الحبحب والشمام والقرع هههههه ضحك ضحكه عاليه وقال اسكت لاتبكيني ياقحم العفاريت قصتي تختلف عن قصتك انت تريد التجاره وانا اريد سد الحاجه اشتري من بائع الجمله وابيع بالحبه اكسب حق العشاء أن حصل ولا الرازق ماينسى أحد من عباده

زميلي صاحب الحبحب : وش رايك ياعيد تشتري بصل بالدارهم اللي معك وتفرقه على اكثر من واحد وهذا شوري عليك اخذت برايه ودخلت على كوم من البصل يشبه جبل في وسط حلقة البصل كم الكيس ياعمده اسفيه كلام صديق قلت له فين المعلم صاحب البصل قال انتا مايفهم انا موزود يعني موجود الله يقص لسانه قال البصل الكيس الصغير بثلاثه ريالات والكبير بعسره يعني عشره والكميه لاتقل عن 100 كيس تشتريها ولا رح دور غيرنا حسبتها ولا هي مناسبه لحجم المبلغ اشتريت 100 كيس خمسين صغير وخمسين كبير قلت طيب كيف اشيلها من هنا قال عربيه تنقلها لك بعشرين ريال وممنوع تتركها في الممرات او على الرصيف على سيارتك فوراً او على البسطه اللي بأسمك ورطت قلت خلاص بطلت ما ابغا بصل قال روه مافيه الا انت في الحلقه جاني واحد هندي قال صديق انا اشتري كل الكميه باسمك واعطيك خمسين ريال وسيب الباقي علي حسبتها ووجدتها طريقه سهله للتحايل على النظام والسعوده المزعومه فكرت وقلت الله الغني عن تجاره بالعرض والمتزاحمين عليها اكثر من النمل

الواصل : وفرت دراهمي وجهدي ورجعت عند اليماني اللي يبيع البرشومي واخذت اربعه كراتين ب 100 ريال ورجعت للبيت لأن الكهله الله يحفظها تحب البرشومي وانا اموت فيه وتركت الكوسه والخيار والجزر والبصل للسكون وعساهم مايتباركون والله يا أحبتي أننا منهوبين ومصالحنا لغيرنا والله مافي الحلقه من السعودين الا الذي مثلي يبحث عن البرشومي أو الحماط والبقيه ياكافي الله يديم علينا نعمة الأمن والإيمان وطاعة الرحمن والله هو الساتر سبحانه وش رايكم لو اشتريت شي راح ينباع ولا احرج عليه بربع القيمه وهذا والله حاصل ان شافوك اشتريت شي من الحراج تواعدوا عليك ولن تلقى من يشتري منك الا أن كان توزعها بلاش او بثمن بخس أو ترميها في الحاويه ويتسابقون عليها بعدك والله هذا مايحدث والله شاهد تحياتي لكم ياتجار الهبوب محبكم في الله القحم الواصل