منتديات هبوب الجنوب - مفاتيح التعامل مع خوف الأطفال وقلقهم

https://mother-and-child.net/wp-cont...22-450x298.jpg

مفاتيح التعامل مع خوف الأطفال وقلقهم

كنت زى أى طفلة عندى حاجات بتخوفنى وتفضل
مش مفهومة بالنسبالى تكبر فى عقلى لغاية ما تبقى عاملة
زى الوحش العملاق فى عقلى ودايما مخاوفى كانت بتجي
لى قبل النوم زى كل الأطفال ..
أنا مازلت فاكرة والدتى ربنا يبارك فيها كانت لما أكون تعبانة
أو خايفة تيجى تقعد جنبى على السرير وتقعد تطبطب على شعرى
وكتفى وتقرأ السور القصيرة من القرآن بصوت واطى وبعدها
تبدأ تتكلم معايا شوية وتحكيلى حكاية لطيفة لغاية
ما أنام و تانى يوم تفتح الموضوع بشكل تدريجى تكلمنى
عن الحاجة اللى قلقانى أو موترانى بهدوء ونتناقش فيها
و شوية شوية … الوحش الكبير يتحول لقطة وديعة
اعرف أروضها و أتعامل معاها ..
مامتى عملت ثلاث خطوات:
1- تواصل عاطفى حسى بالطبطبة وقعدتها جنبى على السرير
2- تواصل روحانى بقراءة القرآن والأدعية وممكن يكون
عن طريق الكلمات الملهمة .
3- تواصل عقلى عن طريق المناقشة والحوار ..
هو دا بالظبط الترتيب المنطقى والعلمى والتربوى للتعامل
مع طفل أو كبير فى حالات الخوف والقلق والتوتر.
بنكون محتاجين نحس بالقرب والإحتواء وبعدها روحنا
بتحتاج تحس بالأمان والسكينة وبعد المرحلتين دول العقل
بيفتح قنواته وبيكون جاهز يفهم ويستوعب .
مفاتيح التعامل مع أطفالكم وقت الخوف والقلق:
1– الأمان العاطفى
2– الإيمان والدين وتنمية الروحانيات
3– المعلومات وفهم منطق الأمور