منتديات هبوب الجنوب - نزعل ونتكبر..ونفخر ونقول

نزعل ونتكبّــر وحنا من الطيـــن *** والكل منا صــــدّ لا أقبل خويّــه

نفخر نقول إنا على الصد قاوين *** وهــيّ علينا في الحقيقـة قـــويه

نشفق على الطيبة و كسب الكريمين*** وهذي بنا ؟؟ لاشك فعــــلة رديـــه

ننسى نهايتنا وعلى وين ماشيــــن*** وننسى الزمان اللي جمعنا ســــويه

المشكلة ما هي بـحاجة لـتخمين *** ولاهي بعد ياناس صعبـة القضيـه

دق الرقم كيفك هلا فيك وأهلين *** أنــا الخـوي اللـي مـزعّـل خويـه

قلّه : تغيب وصـورتك داخل العين *** ويبقــى لـ حبك في خفـوقي بقيــه

أخوان حنا لو يجي بيننا شيــن *** و مانفتـرق دام المحبــة نديـه

خلك قــوي لاتحتـكرك الشياطين *** قبل الفوات وقبل وقت المنيــه

كلّم خويـك بـطيب الهرج واللين *** وأعرف جميل الهرج يمســح رديــه

هذي هي الدنيا من الحين لـ الحين*** لابد بين الناس تحصـــل خطيــــه

ومن لايقدّر غلطة أحبابه الحيـن*** يقــرأ حـروفي ويعتبرها هــديه

باكر تمر سنين وسنين وسنيــن *** والـكل يرحـل في الدروب المديه

صدقني تندم وأذكر حروفنا زين *** تندم على خلك إذا غاب ضيّـه

دنيا غريبـة وأكثر الناس ماشين *** وكم صاحبٍ والله دفنته بـيديـه